حالة فقــــــر .. متفوتهاش !!

حالة فقر

كان الباشمهندس فهيم في مكتبه بغرفة المعيدين يقلب في ورق أعمال السنة ، يعطي الدرجات عشوائيا ويخصم بسبب أو بدون ،المهم أنه وكما علمه أساتذته يجب أن يكون توزيع الدرجات على شكل الجرس بتاع جاوس ، وفجأة دخل عليه رجل أجنبي .
الأجنبي : Hello .
فهيم : أهلا بالسياح Welcome to Egypt .
الأجنبي (بقرف) : I am working in Egypt since 1990 !
فهيم : بقولك ايه أنا ضعيف في الإنجليزي ، حضرتك عايز ايه؟
الأجنبي : I want to talk to you .
فهيم : أنا مش فاهم برضه .
الأجنبي : Please talk in English .
فهيم : Ana Mesh Fahem Enta 3aez eih ?
الأجنبي : I want to talk to an engineer in English
فهيم : بص بقا ، أنا حاجيبلك واحد يكلمك علشان انت بتستخدم مصطلحات أنا مش فاهمها . انت يا ابني ، روح انده للباشمهندس علام .
طالب : هو فين ؟
فهيم : دور عليه ، أكيد بيتسكع في معمل هنا أو هناك .
* * *
في المعمل كان الباشمهندس علام بيقول للطلبة : هي دي التجربة وده الورق بتاعها ، عايزكم تفهموها كويس علشان أنا حاسألكم فيها.
طالبة : يعني حضرتك مش حاتشرحها لنا ؟
علام : أشرحها لكم ؟ ايه الكسل اللي انتوا فيه ده ؟ انتوا فاكرين أني بقيت علام كده بالساهل ، لازم تتعبوا شوية.
طالبة : بس حضرتك بتاخد مرتب علشان تعلمنا ؟
علام : مرتب ايه يا شاطرة ؟ انتي عارفة أنا باخد كام أصلا ؟ انتي لو تعرفي مرتبي كنتي تطلعي من جيبك وتديلي .
طالبة : طيب ما هو ده اللي أنا باعمله في الدرس !
علام : بتقولي ايه ؟
وكان الطالب الذي ارسله فهيم قد وصل فقال لعلام : يا باشمهندس ، الباشمهندس فهيم عايز حضرتك .
علام : أكيد الطلبة أحرجوه بسؤال ، أنا قلت له كام مرة يتهرب منهم لكن ما فيش فايدة ، أنا رايح أشوفه وراجع لكم على طول ، افهموا التجربة كويس علشان حاتشرحوها لي!
* * *
علام : فيه ايه يا فهيم ، ومين الراجل ده ؟
فهيم : مش عارف ، دخل علي بكلام غريب ، الظاهر أنه بيتكلم انجليزي غير اللي أخدناه في الكتّاب . بقولك ايه يا علام ، لو الحكاية فيها سفر لبره ، متنساش أخوك ، أنت عارف أنا أصلا داخل الكلية علشان أسيب البلد في أقرب فرصة .
علام بالإنجليزي: حضرتك مين وعايز ايه ؟
الاجنبي بالإنجليزي : أنا من البنك الدولي ، ومسئول عن برنامج تطوير التعليم في الدول الشحاتة ، وبعد ما عملنا دراسة عن بلدكم ، عرفنا أن أحد اسباب فشل التعليم الجامعي هو فقر أعضاء هيئة التدريس ، مما يؤثر علي العملية التعليمية ويسبب تسرب المعيدين للعمل في وظائف أخرى .
علام بالانجليزي: انت جاي تعايرنا ولا ايه ؟
الاجنبي بالانجليزي : لا ، أنا حاقدم لكم فرصة للانضمام لمشروع "معا ضد فقر المعيدين" ، وإذا اشتركتم في المشروع حتاخدوا 100 دولار كل اسبوع من البنك ، بس لازم تكونوا ثلاثة على الأقل.
علام بالانجليزي: يعني ما ينفعش أدخل أنا بالثلاثة ؟
الأجنبي بالانجليزي : لا .
علام : اسمع يا فهيم ، الراجل ده حايدينا 100 دولار كل اسبوع منحة من البنك الدولي ، ايه رأيك ؟
فهيم : ده سؤال ؟ طبعا موافق .
علام : طيب بس مش ناخد رأي دكتور كومبلكس الأول ؟
فهيم : لا يا عم ده كل حاجه بيعقدها ، مادام الموضوع يمشي من غيره خلاص .
علام : إذن باقي مشكلة واحدة ، لازم كمان معيد معانا .
فهيم : مفيش غيره مع أني مش طايقه .
علام : قصدك الباشمهندس عارف ؟ صح . روح يا ابني انده على الباشمهندس عارف .
الطالب : هو انتو ما عندكوش غيري ؟
علام : اتحرك بسرعة ، عارف عنده سكشن ، قل له علام بيقولك سيب العيال وتعالى فورا .
* * *
في نفس الوقت كان عارف في السكشن بيقول للطلاب : وآخر نسخة من الشيت كانت معايا في الشنطة بس أنا نسيت الشنطة كلها في البيت . معلهش ، افترضوا ان الشيت معانا ، أنا فاكر شكل أول مسالتين وكام رسمة على حبة أرقام ، أهو نمشي حالنا .
طالب : لو سمحت يا باشمهندس ، الشيت اللي فات مش معانا ومش كامل في المكتبة ؟
عارف : وأنا أعمل لك أيه ؟ شوف حد يكون معاه وصور نسخة . وياريت تعمل لي واحدة . أصل نسختي ضاعت .
وهنا دخل الطالب الذي أرسله علام وقال لعارف : الباشمهندس علام بيقول لحضرتك تقلب العيال وتروح له بسرعة ، هو قاعد مع واحد أجنبي والظاهر في حاجه مهمة.
عارف : طيب يا جماعة ، أنا مضطر أمشي. بكره عايز أشوف مع كل واحد حل الشيت الأخير كاملا بالارقام ، وأي واحد أرقامه تطلع زي زميله ، هما الاثنين صفر !
طالب : بس يا باشمهندس ، فيه حاجة كنت عايز اسأل عليها ..
عارف : بعدين ، فكر فيها لوحدك حاتعرفها ، وإذا معرفتهاش يبقى أكيد أنا مش حاعرفها !
* * *
عارف : ايه يا علام ؟ مين الراجل ده ؟ شكله كده من بتوع حقوق الانسان وحايخرب بيتنا .
علام : لا ، ده راجل طيب حايدينا 100 دلار كل اسبوع ، بس عايزين موافقتك . ممكن توقع هنا علشان تستلم أول مائة ، وكل اسبوع حايوصلك زيهم ، لغاية ما التعليم الجامعي في مصر يتحسن ، يعني حاناخدهم للأبد ، يلا وقع خلينا نقبض .
عارف (يوقع بغير اقتناع) : أنا مش مستريح للموضوع ده ، الدكتور كومبلكس ما قالش حاجه ؟
فهيم : كومبلكس ما يعرفش حاجه عن الموضوع ، ده حايفضل سر بينا.
الأجنبي (في سره بالانجليزي) : والله ماهم نافعين ، بس أنا باعمل اللي طلبوه مني في البنك وخلاص.
* * *
بعد اسبوعين ، في غرفة المعيدين ، قال طالب لفهيم : ايه ده با باشمهندس ، أنا أول مرة أجيب الدرجات العالية دي ، مع أني ماحليتش كويس في الامتحان .
فهيم : مش مهم الامتحان ، أنا عارف انك كويس وبتجتهد معايا في السكاشن . ثم كل الدفعة واخده نفس درجتك تقريبا ، حتى الطالب اللي محضرش الامتحان عملت له امتحان خاص به وجاب نفس الدرجة !
الطالب : ياه دا حضرتك اتغيرت قوي ، ياترى ايه السر ؟
فهيم : سر ايه يا ولد ؟ مفيش سر ولا حاجة اتفضل على سكشنك بسرعة .
* * *
وفي المعمل :
علام : وده كتاب فيه شرح للتجربة الأصلية اللي احنا بنحاول نعمل واحدة زيها هنا ، وبعد ما شرحتها لكم بالتفصيل ، فيه أسئلة ؟
طالبة : غريب يا باشمهندس ، حضرتك كنت مش بتشرح أي تجربة زمان إلا في الدرس . دلوقت لغيت الدرس خالص.
علام : ازاي بس الكلام ده ؟ أنا باخد فلوس علشان أعلمكم ، ازاي أهين نفسي واروح عندكم البيت وأخوكي الصغير يضربني على قفايا علشان مبلغ تافه .
طالبة : طيب أنا كنت عاوزه أستعير الكتاب ده ، هو حاضرتك سارقه قصدي مستعيره من مكتبة ايه ؟
علام : مستعيره ايه ، ده أنا شاريه مخصوص علشان التجربة ، ممكن تستعيريه مني بس ترجعيه بسرعة علشان ممكن زمايلك يحتاجوه.
* * *
الباشمهندس عارف في السكشن :
عارف : وده الشيت الجديد ، أنا صورت لكل طالب نسخة ، وكمان طبعت لكم الورق ده من على الأنترنت علشان الموضوع اللي كنتم مش فاهمينه المرة اللي فاتت .
طالب : بس احنا خلاص فهمناه .
عارف : خلاص مش مشكلة ، أنا كمان جبت لكم اسماء مواقع كويسة تدخلوا عليها ، وكلمت بروفيسور من النمسا حايكون اون لاين علشان تعملوا شات معاه وتسألوه عن كل حاجة. الراجل ده هوه أحد مؤلفي الكتاب اللي احنا بنشتغل منه ، يعني ماحدش يغلط ويقول اننا شاغلين من نسخ مضروبة من الكتاب ، لغاية ما توصل شحنة الكتب الأصلية اللي أنا بعت أطلبها لكم على حسابي !
الطلاب : ألف شكر يا باشمهندس ..
* * *
في مكتب الدكتور كومبلكس ، كان الثلاثة جالسين معا : عارف و علام وفهيم .
فهيم : تفتكروا الدكتور كومبلكس عايزنا ليه ؟ دا عمره ما سأل عنا.
عارف : أكيد حايشكرنا على المجهود اللي بنعمله مع الطلبة .
علام : على فكره أنا حاسس اننا اتغيرنا خالص بعد موضوع المنحة ده ، مش كده برضه ؟
فهيم : بس زي ما اتفقنا ، الموضوع ده يفضل سر وماحدش يقول له عليه ، أهو شكله جاي هناك .
يدخل كوملبكس ،
يجلس على مكتبه ويقول لهم : ايه يا حلوين اللي انتو عملتوه ده ؟
عارف : احنا مقطعين نفسنا في الشغل مش كده ؟
كومبلكس : لا يا فالح ، أنا قصدي حكاية البنك الدولي .
نظر الثلاثة لبعضهم وقال فهيم : انت عرفت منين ؟
كومبلكس : البنك بعت الفاتورة دي للكلية ، فيها كل المبالغ اللي سلمها لكم ومطلوب سدادها فورا بفوائد 200 % وبالعملة الصعبة!
علام : ازاي يا دكتور ، دا هما قالوا ان الحكاية علشان تطوير التعليم .
كومبلكس : ماهو انتوا حاتفضلوا طول عمركم حمير ، يعني الأجانب حايهتموا بتطوير تعليمنا أكتر منا ؟ فين عقلكم ياباشمفلسين؟ أنا عايز أعرف ازاي تعملوا كده من غير ما تاخدوا رأيي ؟ هو أنا جردل ميه هنا ؟
عارف : لا العفو ، احنا قلنا بس مادام الموضوع مافيهوش مصلحة لحضرتك أكيد حاتعقدوا لنا أو على الأقل تبقى عين حضرتك في الفلوس فتقل بركتها .
كومبلكس : خلاص يا شطار ، اشربوها لوحدكم .
فهيم : طيب وايه موضوع الفوائد ده ؟
كومبلكس : بيقولوا ان تخريج طالب ممتاز حايفيد البلد باكتر من كده. وأنا قلت لهم ان الكلية مالهاش دعوة بالموضوع وان اللي وقعوا عليه هما اللي حايسددوا المبلغ وأرباحه ، وهما مش مستعجلين ، كل ما تتأخروا في الدفع ، الفوائد تزيد وتفضلوا تسددوا في الفوائد بس لغاية ما تفلسوا وتشحتوا .
عارف : يا نهار مش فايت ، دا احنا ضعنا يا علام .
كومبلكس : خدوا الفاتورة واطلعوا برة أنا مش فاضي لكم .
* * *
في غرفة المعيدين :
طالب : ايه ده يا باشمهندس فهيم ، انا كنت عامل احسن من كده في الامتحان ليه درجتي تعبانة كده ؟ دا أنا حتى باشارك معاك في كل السكاشن ؟
فهيم : تشارك ايه وايه علاقة المشاركة والفهم بالامتحان ، انا باصحح الورقة وبس ، ثم ان ورقتك وصلت لي في وقت كنت فيه متضايق ، وطبيعي أنها تيجي فيك .
طالب : طب أنا أعمل ايه دلوقت ؟
فهيم : ادعي ربنا ان ورقة الامتحان اللي جاي ما تجيش عندي في وقت أكون فيه مديون بأربعة آلاف دولار. وبالمرة ادعي لي ربنا يفك ديني !
* * *
وفي المعمل :
طالبة : هو فين الجهاز بتاع التجربة ؟
علام : بعناه ، القسم محتاج فلوس .
طالبة : طيب احنا حانفهم التجربة ازاي ؟
علام : بسيطة ، انتي شكلك مش بتاخدي درس ، ده رقم موبايلي ، اتصلي بي وكل شئ حايكون تمام .
طالبة : بس أنا سمعت ان حضرتك عملت فوائد على ثمن الدرس ، يعني ايه ؟
علام : مش مهم تفهمي ، المهم ان الدرس بقى بضعف ثمنه . معلهش بقا ، كل حاجة بتغلى.
طالبة : صح يا باشمهندس وبالذات الدولار .
علام : ماحدش يجيب لي سيرة الكلب ده !
* * *
وفي سكاشن الباشمهندس عارف :
عارف : يا جماعة اللي عايز يدخل على الأنترنت ، هنا في القسم الساعة بعشرة جنيه .
طالب : بس الساعة بره باثنين جنيه بس .
عارف : أنا عارف ، بس الانترنت عندنا فيها مميزات مش موجوده بره ، مثلا سرعتنا هي الأبطأ – غير مسموح باستخدام الدسكات لنقل الملفات – يوجد أحدث وأكبر عدد من الفيروسات وأخيرا مستحيل تلاقي جهاز فاضي وقت ما تكون عايزه ، لأن الاقبال علينا عالي جدا.
طالب : طيب ايه اخبار الكتب الأصلية اللي حضرتك قلت عليها ؟
عارف : كتب ايه ؟ أنا حانزل بيهم في معرض الكتاب يمكن أعرف أعوض حاجه من الخسارة ، وبعدين من النهاردة الشيت بربع جنيه عند الداده . وكل واحد يكتب اسمه عندها . مش مهم تحل الشيت ، المهم اسمك يكون مكتوب ، وكل ما تشتري أكتر ، فرصتك في النجاح تكتر !
* * *
دكتور كومبلكس جالس في مكتبه ويدق الساعي على الباب : فيه واحد خواجه عايز حضرتك .
كومبلكس : خليه يدخل .
الاجنبي بالانجليزي : مرحبا يا دكتور كومبلكس .
كومبلكس بالانجليزي المكسر : نعم ، أي خدمة أعمل أنا لك أقدر ؟
الاجنبي بالانجليزي : أنا من البنك الدولي ، وكنا عملنا دراسة لتطوير التعليم عندكم ، ولقينا ان سبب تخلف التعليم عندكم هو انشغال الدكاتره بتحصيل أكل العيش وانصرافهم عن التعليم فقلنا نعمل مبادرة "معا ضد فقر الدكاترة" ، وممكن أي دكتور يشترك فيها ويأخد 300 دولار شهريا ، اتفضل حضرتك وقع هنا بس . شكرا ..