نفسي أعرف فين أم البطة السوده .. اللي جابت 70 مليون مواطن مصري .. بطة دي ولا أرنبه ؟؟ .. تجيب 70 مليون و توصمهم بالعار طول عمرهم .. يبقوا ولاد بطه سوده .. لا طايلين حقهم في الدنيا ولا فالآخره ... حتى انفلونزا الطيور جت و عدت علينا .. و خدت اللي خدته فالشوووطه .. و سابت البطه السوده دي .. متعلقه في رقبتنا .. تكاكي زي ما تكاكي .. و تجيب عيال .. و مصر تزيد من ولاد البطه السوده اكوام اكوام .. منها لله .. و منه لله البط الشركسي اللي عمال يلعب معاها و هيه تجيب الزغاليل اللي مالووو البلد هتقولي ايه جاب سيرة البطه دلوقتي .. هقولك اني قررت انزل من بيتنا بعد غياب طويل عن الشارع .. و ياريتني ما نزلت .. فكرت الاول اركب العربيه .. و الحمد لله لسه طالع من عند باب البيت وقفني عسكري مرور ابن حلال و قالي رخصك .. يهديك يرضيك مفيش .. شكله جاي من الصعيد عدل .. و دماغه و ألف جزمه انه لازم ياخد الرخص .. بسأله مخالفتي ايه يا بن الحلال قالي سرعه ؟؟ قلتله هوه في رادار قدام باب بيتنا ؟؟ قالي لأ .. بالنظر .. طبعا شخص زي ده مينفعش ترد عليه .. و انت شايفه كل شوية يعمل سلامات اشكال و الوان لعربيات ماشيه مفيمه الازار كله .. و اشي نسر .. و اشي نمر سوده .. يعني كل البهارات موجوده .. و بيعدو طبعا .. و محسوبكم حاطط هلال و مبسوط بيه .. و كله ضرب ضرب
رجعت البيت و سبت العربيه و قلت والله اقضيها مواصلات اكرم .. ركبت التاكسي لقيته بيقولي البنديره بقت الضعف .. قلت يا فتاح يا عليم .. خير يا عم الحج ليه ؟؟ قالي البنزين يا بيه .. قلتله احمد باشا بيه افندي نظيف .. بيقول الزياده هتبقى خمسه فالميه بس .. قاللي طب انزل و خلي البيه بتاعك يبقى ياخدك في التاكسي بتاعه .. قلتله خلاص .. خليها علينا .. و طبعا طول السكه بنتكلم في البنزين اللي غلي على الغلابه .. و البشوات اللي بيغلوه و همه مش حاسيين بحاجه .. كل واحد فيهم راكب عربيه الحكومه و البنزين على الشعب يا ولاد .. الشعب
محدش طبعا سألني انت كنت رايح فين ؟؟ لأني هقولكم كنت رايح اجيب ورق .. اصل عندي امتحان كمان يومين عقبال املتكم .. امتحان تخدير 
) .. حاجه تفرح اوي يعني .. و اذ افوجئ و انا في السكه ان الواد احمد قاعد في العربيه بيدن ( من دن يدن دنا .. يعني بيلف و يتسرمح ) .. طبعا استغربت لأنه مش وقت دّن خالص .. اتاري الواحد مخه فوت ... و مبقاش بيجمع .. اصل بسلامته احمد بيه ابن دكتور في الكليه .. يعني انا هقعد استف المعلومات في دماغي .. و ادفسها كويس .. و اسقيها شاي و قهوه و نسكافيه صح الصح .. علشان في الآخر ادخل للدكتور و يوم ما يرضى عني و يضحكلي هيديني 20 من 30 ... إنما احمد باشا .. قاعد يلف في الشوارع .. و هيروح بيتهم ينام و مامي تيجي تحكيله حدوته قبل النوم .. و هياخد الـ30 و هوه على السرير .. ليه بقه .. علشان احنا ولاد البطه السوده اللي مش عارف هيه فين لحد دلوقتي يا جماعه يا بتوع تنظيم الاسره .. يا ماما كريمه .. يا عيادات النجمه الذهبيه .. بالله عليكم .. دوروا على البطه السوده دي و خلصوا البلد منها .. زهقنا من البط الاسود اللي جايبنا لورا .. بانتظار البط الابيض .. و الوز
الرئيسية 